छूटि अओ पानी अउ छूटि अओ देसु
रोटिन की खातिर मिलो हइ परदेसु
जाड़िन मइंँ यादि आई कथरी अउ खेस
लाइ कोई खटिया पइ करइ हमइंँ पेस।।
गरमिन के दिन अउर पेड़न पइ बउर
मकई की रोटी संग चटनी को कउर
गाँव छोड़ि ढूँढइ कोई अंत काये अउर
अपनो सो गाँउ नाईं धत्ती पइ अउर ।।
घूमि लई दुनिया अउ घूमि लये देस
भूलि गए देस, गाँव मन मइंँ अब सेस
कहइँ जल्लाबाद बारे सुनउ संदेस
आधी खाइ लिअउ भइया बसिअउ ना बिदेस।।
-डॉ० सुभाष शर्मा, आस्ट्रेलिया
